Dokumenti i knjige o drugom svetskom ratu na teritoriji Jugoslavije i povezanim zbivanjima
◀ Poezija NOB
Mate Balota - Sipe piva
Kada stepi i podne u anguštu strane,
kad gori kamenje uza more,
tad zapiva Sipe u po gore,
da ga čuju drage na sve strane.
Drugi trudnik trudan u podne počiva,
Sipe trudan u po boka piva.
To je pisma ditinjstva u delu,
mladost mež voli i muke u kavi,
njegovega truda i kratke ljubavi.
Sada piva, neka čuje svit u našem selu,
da je Sipe bisan, kako vezan bak,
ma da još je tote, i da je junak.
Pisma mu je jaka i tržlja od stine,
teška kako bat, i oštra kako strila,
kad zadudnji, srhi, projdu tila.
Ni glasa mekoće, ni traga miline,
pisma prez rišpeta i prez oproštenja,
divlja pisma šume i tvrdog kamenja.
Piva Sipe sam i gleda pustu stran,
di mine još je kako dite vrta
i nikad se ninem ni skrenuja s puta,
da lita je dela po vas dan.
Gleda more, di je dimboko ronija,
kad bi liti z minom zubace ubija.
Piva Sipe, a u glasu mu roštaju makine
veliki brodi, na kih je oganj ložija,
i šume mora. ke je mlad prigazija.
Tresu se kaldaje, krv se tali od silne tepline,
ugljevlje se prosiplje. padaju gradele,
grme kletve, z lica se rone kaplje črne i debele.
Iz Sipinega grla pucaju puške labinske,
kad je on volar, rudar i mornar
se tuka za slobodu, da bude na svojen gospodar.
I da očuva grudu zemlje slavinske.
Iz pisme njegove struja se Rašina dere
šviču vitri i mlate po moru nevere.
A Sipe gleda u magli slike dela, junaštva, boja i smrti.
I ni ga strah od tih krvavih sadašnjih i budućih puti.
Kada ga slušan u podne, kako je mračan, ma lipi,
želin samo jeno: imati tako sto miljari Sipi.