– Zakaj…?
šeptal je bledi jen dečec,
ves musaf i prnjav vuz put.
– Zakaj sem sam na svetu
i dršćem kak prut?…
Kaj opet grmi,
kaj opet ljudi,
ti ludi
želiju oce, a mojega ni…
… Vre su ga zeli,
i topi pojeli
vu boju.
A mamicu moju
je beteg potrla
i ona je vmrla…
Sem sam na svetu,
a lehko je v letu,
gda toplo je svud –
i sunčece greje
na grud,
i krvca mi vreje…
… Nigdo je zna za nas
i nigdo nam neće
prnesti spas…
Su mrzli asfalti
i mokri su jako,
nad njimi ni krova,
na njimi ni lako…
Trbušek je prazen, črez oblok diši pečenka,
se oko prevrača –
i dišim kolača;
se spušta slina
i tako je fina…!
a mori me glad –
… Vetrek me mrzli zagrli,
obloke su gospodske zaprli…
Ima nas puno;
vu gradu,
pred gradom, na selu –
ni traga ni jelu,
niti odelu,
nit hiži –
a saki je danek boži
smrti jen bliži…
Gdo kriv je tomu,
gdo tat?
Mama je vmirala,
z ustmi prebirala:
“Rat, rat…”